ooo

Hajat kami ini :

Kok tinggi gunung 

tinggi lagi hajat kami

kok dalam lautan 

dalam lagi hajat kami

 

Kata orang, bila mengadakan anak :

Kok lelaki serahkan mengaji

Kok perempuan serahkan menjahit

sombong pada emaknya

megah pada ayahnya

Dalam demikian itu, lama-kelamaan :

mengaji pun sudah tamat

menyulam menjahit pun sudah pandai

maka diserulah pula untungnya

Adapun untuk anak lelaki

dicari-carikan

untuk si perempuan

dinanti-nantikan

 

Bulat air dek gopong

Bulat manusia dek muafakat

Penghulu beraja ke muafakat

muafakat beraja kepada yang benar

Ibu hukum muafakat

ibu adat muafakat.

Nan jauh dijemput

nan dekat dikampungkan

hilang dicari 

cicir dipungut

Adat bersendi hukum
Hukum bersendi Kitabullah
Kuat adat, tak gaduhkan hukum
Kuat hukum, tak gaduhkan adat
Ikut hukum, muafakat
Ikut adat muafakat.
Kelebihan nabi dengan mukjjizat
Kelebihan umat dengan muafakat
Bulat air kerana pembetung
Bulat manusia dengan muafakat
Air melurut dengan bandaraya
Benar melurut dengan muafakatnya

Raja menobat di dalam alam
Penghulu menobat di dalam luak
Lembaga menobat di dalam lingkungannya
Orang banyak menobat di dalam terata

Raja menobat di dalam alam
Penghulu menobat di dalam luak
Lembaga menobat di dalam lingkungannya
Ibu bapa menobat pada anak buahnya
Orang banyak menobat di dalam terataknya

Yang mencincang, memapas
Yang membunuh membangunkan
Yang menjual, memberi balas
Majlis di tepi air
Mendesa di perut kenyang
Yang buta penghembus lesung
Yang pekak pelepas bedil
Yang lumpuh penghuni rumah
Yang kuat pembawa beban
Yang bingung disuruh-suruh
Yang cerdik lawan berunding

Ese hendak menumpang tanyo,

Kok nak mencincang mano landasannyo,

Kok nak melompek mano tumpuannyo,

Kok nak menembak mano sasarannyo,

 

Kok alam dah berajo,

Kok Luak dah bopenghulu,

Kok Lembaga dah bosuku,

Kok Bopak dah beranak buah,

Duduk dokek rumah dokek kampong,

Sehalaman (solaman), sepermainan, (sopomainan)

Sejamban (sojamban), sepelaungan (sopolaungan),

Seperigi (sopigi), sepermandian (sopomandian),

Duduk bosuku-suku,

Suku Nan Duo bole’h,

Kok hukum tak mongambek,

Kok adat tak monghalang,

Mako dibule’hkan somondo monyomondo,

Mako kodatangan ese podo hari nan sohari ni,

Ese tolah diarahkan oleh ompek mendo,

Untuk monjomput adat dan posako anak buah Dato',

Borsorto dongan orang eh sokali (pengantin lelaki).

Kok hutang nak dibayar, kok piutang nak diterima.

 

Kok datang dah borjomput,
Kok sampai dah bersapo,
Dek ado tali pongelak, tangkai ponjenjing,
Kok poie nak molopehkan,
Yang poie naklah solopeh,
Yang tingga naklah solotak,
Kok muko nak joghoneh, kok ati nak boghosih,
Yang poie jangan lupo pandang ko bolakang,
Yang tingga jangan lupo pandang ke dopan,
Kok datang biarlah nampak muko, kok poie biarlah nampak bolakang,
Kok momakai nak yang elok, kok makan nak yang halal,
Padang orang jangan cubo nak bolari,
Kok nak bolari, padang sondiri,
Poie tompek orang jangan buek rosmi ayam jantan,
Buek rosmi padi, makin tunduk makin borisi,

Tompek orang jangan dibuek kopantangan ompek mondo,
Polesit dua se kampong,
Sobatang anau dua sigai,
Buek ghumah dalam ghumah.

Kok monanam tak bobonih,
Kok tumboh tak bomato.
Boghi satu, jangan ambik duo.

Ibarat pokok, kok sokah tordongar lorak ea
Kok ghobah tordongar lorumnya.

Kok cicir nak dipungut,
Kok hilang nak dicarghi,
Kok tortimbun nak di kokeh.

Untung samo-samo labo ea, kok cicir samo-samo rughi.

Kok diseru dio menyaout, kok dipanggea dio datang,
Kok dipandang dio nampak, kok totanam ado tando ea,
Kok mati ado batu nisan ea.

Bukan hutang sobarang hutang,
Bukan hutang kain nan bohasto,
Bukan hutang ringgit nan bobilang,
Bukan hutang omeh nan botahil.

Kok hutang nak ese bayar,
Kok piutang nak ese terima,
Tetapi hutang adat dan pesaka.

kalau di lipek sobosar kuku…
kalau di bontang sobosar alam….
kok hilang di chari, kok hanyut di pinteh…
kok tonggolam di solam, jauh di imbau, dokek di ghamit